Скопје, 10 април 2020 (МИА) – Независниот синдикат на машиновозачи се надева дека машинскиот персонал и службите ќе бидат изземени од владината уредба за ограничување на наплатата на надоместоци и додатоци на плата.
Синдикатот во денешното соопштение наведува дека од првиот ден на вонредната состојба без прекин се одвива железничкиот транспорт на стоки.
– Ако се земе предвид дека железничкиот сообраќај, за разлика од камионскиот, е единствениот кој во овие услови го извршува меѓународниот, како и домашниот транспорт на стока со што допринесува за одржување на економијата и полнење на буџетот зачудува како машинскиот персонал и службите кои го опслужуваат, не е награден, најмалку изедначен со здравствените работници, министерството за внатрешни работи и одбрана, велат од Синдикатот.
Додаваат дека доколку не бидат изземени од оваа уредба, ќе биде доведено во прашање нормалното одвивање на железничкиот сообраќај. бак/сп/
