Германскиот министер за енергетика изјави дека сите министри на земјите од Г7 го одбиле барањето на Русија за плаќање на руската енергија во рубљи, пишуваат агенциите.
Роберт Хабек изјави за новинарите дека сите министри целосно се согласиле дека ова ќе биде еднострано и јасно кршење на постоечките договори.
Хабек по онлајн состанокот со министрите за енергетика на Г7 рече дека плаќањето во рубљи не е прифатливо и ќе ги повика компаниите да не го следат барањето на рускиот претседател Владимир Путин.
Запрашан од новинарите дали Русија би можела да ја намали испораката на гас за европските клиенти доколку тие го одбијат барањето за плаќање на рускиот гас во рубљи, портпаролот на Кремљ, Дмитриј Песков, рече дека очигледно нема да испорачува гас бесплатно.
Путин минатата недела објави дека Русија ќе бара од непријателските земји сега да плаќаат за природен гас само во руска валута. Тој и нареди на централната банка на земјата да развие процедура за купувачите на природен гас и плаќањата во рубљи. Песков денеска изјави дека разговорите за тоа се во тек.
