Пратеничката група на ВМРО-ДПМНЕ до Собранието денеска поднесе Предлог закон за дополнување на Законот за пензиското и инвалидското осигурување, по скратена постапка, информира на прес-конференција координаторот на пратеничката група, Никола Мицевски.
Како што рече тој, овој предлог закон предвидува зголемување на пензиите за 20%, од месец април 2022 година.
„Имајќи ја предвид појавата на пораст на цените на одделни производи и електричната енергија кои се од витално значење за пензионерите како потребата од подобрување на животниот стандарт, сметаме дека треба да се обезбеди зголемување на старосната пензија, но и на сите останати видови пензии“, порача Мицевски додавајќи дека со предложеното законско решение ќе се подобри социјалната положба на корисниците на пензија.