Атланта Хокс ја прекинаа серијата од три победи, со поразот од Милвоки Бакс 120:109. Голден стејт Вориорс славеа против Кливленд Кавалирс 119:101.
Дуелот на екипите кои се наоѓаат на третото и четвртото место, во Источната конференција, го обележа Богдан Богдановиќ од Атланта Хокс. Српскиот репрезентативец, по паузата од два месеци, полека ја фаќа вистинската форма и на последните пет натпревари е најдобриот играч на Атланта.
Против Милвоки, Богдановиќ, постигна 28 поени, на кои придодаде шест скока и седум асистенции. Тој погоди шест тројки од 12 обиди, од поле шутираше 10/20. Дабл-дабл, со 16 поени и исто толку скокови, за Атланта одигра Клинт Капела.
Милвоки го предводеше Џру Холидеј со 23 поени и седум асистенции, Брук Лопез забележа 19 поени и 12 скокови, а најдобриот играч на Бакс, Јанис Адетокумбо постигна 15 поени.
Стеф Кари ги предводеше Голден стејт Вориорс во победата над Кливленд 119:101. Кари постигна 33 поени и го донесе својот тим на скор од 28 победи и исто толку порази. Кари на последните девет натпревари постигнува најмалку 30 поени.
Голема помош доби од Ендрју Вигинс кој уфрли 23 поени. Колин Секстон кај Кливленд, мечот го заврши со 30 поени.
> Блесок на Богдановиќ во поразот на Атланта, Кари го растури Кавалирс <
