Утрински Весник
Магазин

Ќе се реставрира „Ноќната стража“ на Рембрант

Ќе се реставрира „Ноќната стража“ на Рембрант

Амстердам, 8 јули 2019 (/) – Холандскиот музеј Ријкс во Амстердам денеска почнува со реставрација на сликата „Ноќната стража“ на славниот сликар Рембрант ван Рејн.

Обновувањето на сликата ќе се пренесува и на интернет, а станува збор за „истражувачки труд и за најобемна и најкомплетна реставрација на Рембрантово ремек-дело во историјата”, соопштија од музејот.

Холандскиот уметник Рембрант (1606-1669) ја изработил сликата во 1642 година по нарачка на началникот на Градската стража на Амстердам, Франс Банинг Кок. Сликата е висока 3,8 метри, долга 4,5 метри и тежи 337 килограми. Повеќепати била реставрирана, а последниот пат по инцидент во 1975 година, кога вандал ја оштетил со нож.

Пред извесно време, од музејот забележале дека во некои делови сликата почнува да ја губи бојата, особено околу оштетените делови претходно.

– Последниве години забележавме дека сликата бледее на долниот крај. Ние ќе се обидеме да откриеме за што станува збор, за што подобро да биде реставрирана. Тоа може да трае и со години, објасни директорот на музејот, Тако Дибиц кога во октомври го најави обновувањето.

Уметничкото дело беше централен експонат на изложбата организирана по повод 350-годишнината од смртта на познатиот холандски сликар. си/сд/

Извор: mia.mk

Можете да прочитате

(Видео) Пич и Донки конг во новиот трејлер за филмот „Супер Марио Брос“

Рис Витерспун со впечатлив изглед на настан во Лос Анџелес

Ким сподели фотографии од својот дом, фановите збунети: Како можеш да живееш овде?