Утрински Весник
Македонија

Три лица обвинети за насилство во Чаир

Отворена истрага против лице кај кое биле пронајдени марихуана и амфетамин

Скопје, 3 jули 2019  (Утрински Весник) – Основното јавно обвинителство Скопје поднесе обвинение против три лица за сторено кривично дело – насилство, што го сториле на 20 декември минатата година, на паркингот позади маркет во Чаир.
Обвинетите, како што соопшти Јавното обвинителство, во група извршиле грубо насилство врз едно лице и во јавноста предизвикале чувство на несигурност и страв. Тие му се приближиле на оштетениот и го нападнале удирајќи го со тупаници по лицето и телото.
-За сите тројца на сила се мерки на претпазливост определени со решение на судија на претходна постапка од Основниот кривичен суд – Скопје: забрана за напуштање на престојувалиште, повремено јавување кај службено лице во Судот, привремено одземање на патната исправа, односно забрана за нејзино издавање и забрана за напуштање на државата, како и забрана за приближување и одржување каков било контакт со оштетениот, се наведува во соопштението од Обвинителството.

На критичниот ден, од страна на непознато лице кое било заедно со обвинетите, на оштетениот му била нанесена и огнострелна повреда во десната потколеница, но сторителот не е идентификуван.

-Во текот на кривичната постапка, Министерството за внатрешни работи лиши од слобода едно лице како евентуален сторител на кривичното дело. Во присуство на јавен обвинител, согласно Законот за кривична постапка, беше извршено препознавање, но оштетениот не го препозна тоа лице како лицето кое му ја нанело повредата со огнено оружје, посочуваат од Обвинителството.

Доколку Министерството за внатрешни работи, како овластен орган за утврдување на идентитетот на сторителите на кривични дела, го утврди идентитетот на лицето кое пукало во оштетениот, Основното јавно обвинителство Скопје ќе отвори постапка и против тоа лице. дма/са/

Извор: mia.mk

Можете да прочитате

Министерката Петровска на безбедносен форум во Црна Гора – ќе се дискутираат прашања за регионалната безбедност

Сончево време со температура до 26 степени

ВМРО-ДПМНЕ денес ќе достави измени на законот за здруженија