Велес, 10 јули 2019 (Утрински Весник) – Детскиот хор „Св Кирил и Метoдиј“ под раководство на професорката Веселинка Маџарова освои второ место во конкуренција на 44 хорови од 11 земји, на петтиот Интернационален фестивал за хорска музика во Чанаккале, Република Турција, а кој се одржа од 2 до 7 јули.
Младите хористи денеска ги прими и им честита за успехот градоначалникот Аце Коцевски.
-Вие сте на врвот и ви посакувам уште многу успеси да бидете горди на постигнатото, бидејќи сте вистински амбасадори на културата на градот и земјава и затоа ние како општина и понатаму ќе ве поддржуваме, истакна Коцевски.
Професорката Веселинка Маџарова искажа благодарност до градоначалникот и Општина Велес за поддршката и, како што рече, се надева дека ќе продолжи и понатаму.
Детскиот хор „Св. Кирил и Методиј” во текот на летниот период има планирано повеќе активности и настапи.
Минатиот месец хорот имаше целовечерен концерт во Домот на култура „Марко Цепенков” во Прилеп, под покровителство на Министерството за култура. ад/ир