Берово, 3 декември 2019 (МИА) – Делегација од Општина Берово учествува на 4.Меѓународна конференција што во рамки на програмата „Европа за граѓаните“, која во организација на Европската асоцијација за локална демократија „Алда“ се одржува во Белгија.
На конференцијата, како што информираат од Општина Берово, учествуваат претставници од осум европски држави, кои низ различни интерактивни активности, разменуваат искуства за културното наследство, паметни културни села, важноста на социјалните иновации за целите на културното наследство.
– Во рамки на активностите главна цел е да се согледаат различните стратегии преку различен пристап во стратешкото планирање на европско и локално ниво и да се искористат добрите практики од Европа, во делот развој на руралниот туризам, соопштија од Општината.
Настанот е збогатен со учество на претставници од седум партнерски организации од Шпанија, Хрватска, Бугарија, Белгија, Португалија и Латвија, додека Општина Берово и земјава ја претставува градоначалникот Звонко Пекевски.
– Низ презентации, различни интерактивни активности, панел дискусии, имавме прилика да размениме искуства меѓу државите за предизвиците во туризмот во Европа и европското културно богатство, како и да работиме на воспоставување на партнерска соработка меѓу европските држави, истакна Пекевски.
Активностит,е како што додаде, се реализираат во период од две години како дел од „EUSave“ мрежата и имаат за цел трасирање на транснационална стратегија за развој на туризмот, за што средства се обезбедени од COSME програмата на ЕУ.
Следна меѓународна конференција каде што Општина Берово ќе учествува ќе се реализира во март следната година во Португалија. вс/мс/
