Утрински Весник
Македонија

Дебата за Стратегијата за едно општество: Граѓаните да уживаат еднакви, а не посебни права

Дебата за Стратегијата за едно општество: Граѓаните да уживаат еднакви, а не посебни права

Скопје, 4 јули 2019 (Утрински Весник) – Професори и студенти од повеќе факултети и студиски насоки на Државниот универзитет во Тетово  денеска  учествуваа на дебата за Нацрт-текстот на Националната стратегија за развој на концептот за едно општество и интеркултурализмот во Република Северна Македонија.

Воведничари во дискусијата беа Роберт Алаѓозовски, претседател на координативното тело за изработка на Стратегијата, Рубин Земон, пратеник во Собранието на РСМ и поранешен советник на премиерот за мултикултурализам, како и професорите од ДУТ Рабије Мурати и Муса Мусаи.

Како што соопшти владината прес-служба, Алаѓозовски истакна дека она што стратегијата треба да овозможи е сите граѓани да ги уживаат нивните права врз основ на нивната различност,  воедно посочувајќи на поентата искажана за време на дискусијата дека тоа не подразбира посебни, туку еднакви права за сите.

-Политичката волја и разбирањето на ‘другиот’ не се доволни, потенцираше Алаѓозовски и додаде дека е неопходно зголемување на јазичните и други компетенции, на капацитетите, знаењата и вештините во повеќе области за надминување на поделбите во општеството.

Пратеникот Рубин Земон, поранешен советник на премиерот за мултикултурализам, истакна дека оваа Стратегија може да даде повеќе фокус на интеркултурните односи, а не го исклучува и мултикултурализмот што досега се развива и ќе се развива во иднина.

-Тоа ни е потребно, за да градиме општество каде ќе нема дискриминација, исклучување, каде сите луѓе ќе се чувствуваат еднакви, рече Земон. Тој се фокусираше и на пречките за дијалог внатре во институциите, нефункционирањето на комитетите за односи меѓу заедниците, и во Собранието, и во поголем дел од општините, посочувајќи дека со нивно вистинско ставање во функција тие би можеле да придонесат за решавање на многу од отворените прашања и дилеми со кои се соочуваат сите заедници.

Петрит Сарачини од Секторот за односи со јавност при Владата на РСМ го презентираше Нацрт-текстот на Стратегијата пред присутните, додека со дискусии, предлози и сугестии за текстот на Стратегијата во дебатата се вклучија и учествуваа повеќе професори и студенти од оваа високообразовна установа. хс/дма/

Извор: mia.mk

Можете да прочитате

СДСМ: Во време на криза училиштата не смеат да се затвораат, општините да ги редефинираат приоритетите

108 санкционирани возачи во Скопје

СДСМ: Заради бизнис интереси на Мицкоски и ВМРО-ДПМНЕ, стои Скопје