Утрински Весник
Македонија

Во Велес ликовни инклузивни работилници

Во Велес ликовни инклузивни работилници

Велес, 5 јули 2019 (Утрински Весник) – Во просториите на Здружението на лица со телесен инвалидитет „Мобилнoст“ во Велес деновиве се одржаа неколку ликовни инклузивни работилници, а на кои заеднички твореа и се дружеа десет талентирани ученици од редовните основни училишта и пет ученика со попреченост од Посебното основно училиште „Маца Овчарова“.
Зага Колодезни, дефектолог од Посебното училиште во Велес е и автор на овој проект насловен „Ликовен инклузивен караван“ а во чии рамки се одржале неколку инклузивни ликовни работилници.

На овие работилници под менторство на ликовните педагози Елена Димова Пантелиќ и Драганчо Таневски, на Колодезни и на нејзините колешки дефектолози Марија Давчевска и Живка Панова Саздова, учесниците се запознале со творење во техниките сликање со акварел, водени бои и акрилни бои. Воедно изработувале експонати со графичката техниката монотипии, и моделирале форми и експонати со глина и гипс

-Целта на проектот е подобрување на социјалната инклузија на деца и млади со попреченост на возраст од 13 до 15 години преку ликовно творење со нивни врсници со нормален развој, потенцира Колодезни.

Таа од нејзиното 19-годишно искуство и секојдневниот контакт со оваа група на ученици, оценува дека овие деца и млади имаат неверојатен талент и уште поголема мотивираност за творење, желба за другарување и потреба за самодокажување. Појаснува дека инклузијата на лицата со попреченост е тренд на современото општество, но во реалноста многу малку е применета во вистинската смисла на зборот.

-Проблемот со нивната инклузија во најголема мера ја гледам во неприфаќањето на лицата со попреченост од страна на другите лица во општеството, како и нивното недоволно вклучување во повеќе сегменти на општественото живеење, вклучително и разни уметничко-креативни активности, оценува Колодезни.

Воедно потенцира дека преку вакви и слични работилници, спортски и други културни и други манифестации кои ги организирала, а во кои заедно биле вклучени врсници-децата од редовните и децата од посебните основни училишта, многу полесно и поедноставно се прифаќаат овие лица.

Колодезни информира дека освен овие работилници во проектот се предвидени и три ликовни колонии на различни локалитети во земјава и тоа Ликовна колонија за сликање на платно со акварел и акрилни бои- „Езерски убавини“ која ќе се реализира од 13.-18 јули во Струга во Детското одморалиште „Мајски цвет“,
во август во Планинарскиот дом „Папрадиште“ е планирана Ликовна колонија за изработка на монотипии и  третата последна Ликовна колонија Стоби е предвидена на почетокот на септември, а на која ќе се изработуваат  експонати од глина и гипс инспирирани од археолошкиот локалитет Стоби.
Таа информира дека сите дела кои ќе бидат изработени на работилниците и на колониите ќе бидат изложени на продажна изложба која е планирано да се реализира на почетокот на октомври, а  да биде  промовиран и каталогот со сите изработки.
– Средствата  собрани од  продажбата на делата ќе бидат наменети за организрање на нови креативни работилници помеѓу децата и младите со попреченост и со типичен развој. Со тоа се надевам и очекувам  да придонесеме за подигање на инклузивната култура помеѓу младите, но и кај возрасните граѓани на Општина Велес, вели Колодезни. ад/ев/

 

Извор: mia.mk

Можете да прочитате

124 казни за брзо возење на територија на СВР Битола

Маја Морачанин повторно избрана за претседател на ДОМ

Утре наутро блокада на крстосницата кај „Мавровка“